ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងថា ការវិនិយោគមកកាន់កម្ពុជាមិនត្រឹមតែចូលទីផ្សារនៃពលរដ្ឋកម្ពុជា ១៦លាននាក់ប៉ុណ្ណោះទេ តែជាការចូលក្នុងទីផ្សាររបស់មនុស្សរាប់ពាន់លាននាក់។

សម្ដេចលើកឡើងក្នុងកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកលឆ្នាំ២០២៤ នៅសណ្ឋាគារសូហ្វីតែល ភ្នំពេញ ព្រឹកថ្ងៃទី២៦ ខែវិច្ឆិកា ឆ្នាំ២០២៤ថា កម្ពុជាមានកិច្ចព្រមព្រៀងពាណិជ្ជកម្មសេរីជាមួយបណ្ដាទីផ្សារធំៗដូចជា RCEP ចិន កូរ៉េ និងភាពជាដៃគូសេដ្ឋកិច្ចអារ៉ាប់រួម ដែលមានមនុស្សរាប់លាន។

សម្ដេចថា មានចំនុចពិសេសចំនួន៦ ដែលអំណោយផលចំពោះការវិនិយោគនៅកម្ពុជារួមមាន ការរក្សាបាននូវសន្តិភាព ស្ថេរភាពនយោបាយ សេដ្ឋកិច្ចបើកចំហរ គោលនយោបាយលើកទឹកចិត្តកម្រិតខ្ពស់ជួយដល់អាជីវកម្មឲ្យមានការរីកចម្រើន ផលប្រយោជន៍នៃកិច្ចព្រមព្រៀងពាណិជ្ជកម្មសេរី ការសម្រេចបាននូវការអភិវឌ្ឍប្រកបដោយចីរភាពនិងថាមពលកកើតឡើងវិញ ហើយកម្ពុជាគឺជាប្រទេសនៅកណ្ដាលអាស៊ានដែលជួយឲ្យអ្នកវិនិយោគមានភាពងាយស្រួលក្នុងការកាត់បន្ថយចំណាយនិងការដឹកជញ្ជូនទៅក្នុងប្រទេសក្នុងតំបន់នេះ។

សម្ដេច បានលើកទឹកចិត្តទៅឲ្យអ្នកវិនិយោគទាំងអស់ចាប់អារម្មណ៍លើការវិនិយោគនៅកម្ពុជា ដោយសម្ដេចថា៖ «តួនាទីរបស់រដ្ឋាភិបាលខ្ញុំគឺបង្កើតបរិយាកាសអំណោយផលដែលធុរកិច្ចមានការរីកចម្រើនអ្នកនវានុវត្តន៍អាចមានភាពជឿនលឿនហើយសេដ្ឋកិច្ចត្រូវបានថែទាំ»៕